ജില്ലാ സ്റ്റേഡിയത്തില് റിപ്പബ്ലിക് ദിനം വിപുലമായി ആഘോഷിക്കും ആരോഗ്യമന്ത്രി വീണാ ജോര്ജ് മുഖ്യാതിഥിയാകും
ഭാരതത്തിന്റെ 75-ാമത് റിപ്പബ്ലിക് ദിനം ജനുവരി 26നു പത്തനംതിട്ട ജില്ലാ സ്റ്റേഡിയത്തില് വിപുലമായി ആഘോഷിക്കുന്നതിന് ജില്ലാ കളക്ടര് എ ഷിബുവിന്റെ അധ്യക്ഷതയില് ചേര്ന്ന ആലോചനാ യോഗം തീരുമാനിച്ചു. വിപുലമായ ഒരുക്കങ്ങള് നടത്തി ബന്ധപ്പെട്ട വകുപ്പുകള് കൃത്യമായ ഏകോപനം നിര്വഹിക്കണമെന്നു കളക്ടര് പറഞ്ഞു.
റിപ്പബ്ലിക് ദിനഘോഷത്തില് ആരോഗ്യമന്ത്രി വീണാ ജോര്ജ് മുഖ്യാതിഥിയാകും. ജനുവരി 22നും 23നും ഉച്ചകഴിഞ്ഞ് മൂന്നിന് പരേഡ് പരിശീലനവും 24ന് രാവിലെ ഏഴിന് ഫൈനല് പരേഡ് റിഹേഴ്സലും ജില്ലാ സ്റ്റേഡിയത്തില് നടക്കും. പോലീസ്, ഫയര് ആന്ഡ് റസ്ക്യു, സിവില് ഡിഫന്സ്, എക്സൈസ്, ഫോറസ്റ്റ്, സ്കൗട്ട് ആന്ഡ് ഗൈഡ്സ്, എന്സിസി, എസ്പിസി, ജൂനിയര് റെഡ്ക്രോസ് എന്നിവ പരേഡില് അണിനിരക്കും. സാംസ്കാരിക പരിപാടി, ബാന്ഡ്, ദേശഭക്തിഗാനം എന്നിവയുടെ ഏകോപനം വിദ്യാഭ്യാസ ഉപഡയറക്ടര് നിര്വഹിക്കും. പരേഡിനും പരിശീലനത്തിനും സ്കൂള് വിദ്യാര്ഥികളെ എത്തിക്കുന്നതുമായി ബന്ധപ്പെട്ട ക്രമീകരണങ്ങള് ഏകോപിപ്പിക്കുന്നതിനായി ആര്ഡിഒയെയും വിദ്യാഭ്യാസ ഉപഡയറക്ടറെയും ചുമതലപ്പെടുത്തി.
സെറിമോണിയല് പരേഡ്, സുരക്ഷ, അനൗണ്സ്മെന്റ്, ട്രോഫി വിതരണം എന്നീ ചുമതലകള് പോലീസ് നിര്വഹിക്കും. അപകടങ്ങള് ഉണ്ടാകാതെ ഫയര്ഫോഴ്സ് സുരക്ഷ ഒരുക്കും. പരിശീലന ദിവസങ്ങളിലും പരേഡ് ദിവസവും കുടിവെള്ള ലഭ്യത വാട്ടര് അതോറിറ്റിയും വൈദ്യുതി കെഎസ്ഇബിയും ഉറപ്പാക്കും. സല്യൂട്ടിംഗ് ബേസ്, പവലിയന് നിര്മാണം എന്നിവ പൊതുമരാമത്ത് കെട്ടിട വിഭാഗം നിര്വഹിക്കും. സൗണ്ട് സിസ്റ്റം, ജനറേറ്റര്, വൈദ്യുതി ക്രമീകരണം ഇലക്ട്രോണിക്സ് വിഭാഗം നിര്വഹിക്കും. പരിശീലന ദിവസങ്ങളിലും പരേഡ് ദിവസവും ആംബുലന്സ്, മെഡിക്കല് ടീം സൗകര്യം ജില്ലാ മെഡിക്കല് ഓഫീസര് (ആരോഗ്യം) സജ്ജമാക്കും. ജില്ലാ സ്റ്റേഡിയം പത്തനംതിട്ട നഗരസഭ വൃത്തിയാക്കും.
യോഗത്തില് ജില്ലാ പൊലീസ് മേധാവി വി അജിത്ത്, വിവിധ വകുപ്പുദ്യോഗസ്ഥര് തുടങ്ങിയവര് പങ്കെടുത്തു.